Өмнөд Солонгосын тал Оросын түрэмгийллийн эсрэг тэмцэж буй Украинд хэдэн зуун мянган их бууны сум нийлүүлэх шийдвэр гаргасан ба өдгөө шилжүүлэх шатандаа явж байгаа талаар Wall Street Journal сонин мэдээлсэн байна.
Өмнөд Солонгос нууц гэрээний дагуу эдгээр сумнуудыг АНУ руу шилжүүлж байгаа бөгөөд шилжүүлэх үйл явц дууссаны дараа Украин руу үе шаттайгаар илгээх төлөвлөгөөтэй байгаа талаар тус мэдээнд дурджээ.
Түүнчлэн АНУ-ын албаныхны үзэж буйгаар энэ нь Украины талын Оросын эсрэг довтлох ажиллагаанд эергээр нөлөөлөхөөс гадна дэлхийн олон улс оронд хориглосон байдаг энэ төрлийн сумыг Украинд нийлүүлэх эсэх талаарх хүнд шийдвэр гаргах хугацааг хойшлуулах боломжийг АНУ-д олгоно хэмээн мэдэгдсэн байна.
Цагаан ордон болон Өмнөд Солонгосын засгийн газар аль аль нь энэ талаар тайлбар өгөхөөс татгалзжээ.
АНУ-ын Батлан хамгаалах яам эдгээр их бууны сумыг хэрхэн шилжүүлж байгаа болон хэзээ бүрэн шилжүүлж дуусах талаар тайлбар өгөхөөс татгалзсан ч Өмнөд Солонгосын засгийн газартай пуужин худалдаж авах талаар хэлэлцэж тохиролцоонд хүрсэн болохоо хүлээн зөвшөөрсөн хэмээн тус сонин цохон тэмдэглэв.
Энэ нь үхлийн зэвсэг нийлүүлэх эсэх талаар эргэлзсээр ирсэн Өмнөд Солонгосын засгийн газрын байр суурь өөрчлөгдсөнийг харуулж байна гэж тус сонин дүгнэжээ.
Эх сурвалж: SBS