350 орчим мэдээллийн технологийн компанийн удирдлагууд болон эрдэмтэд хурдацтай хөгжиж буй хиймэл оюун ухааны аюулын талаар сэрэмжлүүлсэн байна.
"Хиймэл оюун ухааны аюулгүй байдлын төв” гэх ашгийн бус байгууллагын зүгээс хиймэл оюун ухаан нь хүн төрөлхтнийг мөхөөх магадлал бий гэдгийг дурдаад уг технологийг хянах шаардлагатай гэж мэдэгдсэн талаар Wall Street Journal сонин мэдээлэв.
Тус ашигийн бус байгууллага нь “Хиймэл оюун ухаантай холбоотойгоор тулгарч болзошгүй хүн төрөлхтний мөхлийн эрсдлийг бууруулах нь дэлхий нийтийн тэргүүлэх зорилт болох ёстой" хэмээн уриалжээ.
Мөн хиймэл оюун ухааны хор хөнөөлийг цөмийн зэвсэг болон шинээр үүсч буй халдварт өвчинтэй харьцуулж, олон нийтээр хэлэлцүүлэх шаардлагатайг онцоллоо.
Энэхүү мэдэгдэлд сүүлийн үед олны анхаарлын төвд буй AI ChatGPT-г хөгжүүлэгч OpenAI компанийн гүйцэтгэх захирал Сэм Алтман, Microsoft-ын технологи хариуцсан захирал Кевин Скотт, Google компанийн хиймэл оюун ухааны салбарын тэргүүн Лила Ибрахим зэрэг холбогдох салбарын олон тооны мэргэжилтэн, эрдэмтэд гарын үсэг зурсан байна.
Өмнө нь OpenAI-ийн гүйцэтгэх захирал Алтман хиймэл оюун ухааны сөрөг нөлөөллөөс урьдчилан сэргийлэх, болзошгүй эрсдэлийг хянахын тулд Олон улсын цөмийн эрчим хүчний агентлаг зэрэг олон улсын байгууллагатай хамтран ажиллах хэрэгтэй хэмээн санал бодлоо солилцож байсан билээ.
Энэ сарын эхээр Цагаан ордон буюу дэд ерөнхийлөгч Камала Харрисын зүгээс зохион байгуулсан уулзалт арга хэмжээнд Google, Open AI зэрэг салбартаа тэргүүлэгч компаниуд оролцож байсан билээ.
Эх сурвалж: MBC