Лхагва гарагт Канадын Эрүүл мэндийн агентлагаас мэдээлснээр тус улс ойрын хугацаанд тамхи нэг бүрийн ишийг анхааруулга бүхий зурвастай болгоно гэжээ.
Шийдвэрийн хүрээнд BBC сувгаас тайлбарласнаар тамхины иш бүр дээр “Тамхи хорт хавдар үүсгэдэг”, “Соролт бүрд хор бий” гэх зурвас байх гэнэ. Улмаар шинэ зохицуулалт ирэх наймдугаар сарын нэгний өдрөөс мөрдөгдөх ажээ.
Канад улсын хувьд 2035 он гэхэд иргэдийн дундах тамхины хэрэглээг 5 орчим хувиар бууруулна гэж зорьсон юм.
Тийнхүү шийдвэрийн хүрээнд 2025 оны дөрөвдүгээр сар гэхэд тус улсад зөвхөн анхааруулга бүхий зурвастай тамхинууд л худалдаалагдах гэнэ.
Судалгаагаар Канад улсад жил бүр 48,000 хүн тамхинаас болж амиа алддаг гэсэн тоо гарснаар тэд тус арга хэмжээг авах болжээ.
Өдгөө Канад улсад худалдаалагдаж буй тамхинуудын хувьд хайрцгийн гадна талд анхааруулга бүхий зурвас, зурагтай хэдий ч эрх баригчдын дүгнэснээр тэдгээр нь тийм ч их нөлөө үзүүлэхгүй байгаа юм. Тиймээс тэд тамхины иш бүрийг зурвастай болгохоор шийдвэрлэсэн байна.
Эх сурвалж: BBC