Газрын тос олборлогч орнууд олон улсын зах зээлд үнэ нь буурсаар буй газрын тосны үнийг өсгөхөөр олборлолтоо дахин бууруулах болжээ.
Тодруулбал, даваа гарагт BBC сувгаас мэдээлснээр Саудын Араб улс л гэхэд долоодугаар сараас эхлэн өдөрт олборлох газрын тосны хэмжээгээ 1 сая баррелиар бууруулах болсон бөгөөд Газрын тос Экспортлогч Орнуудын Байгууллагаас мэдэгдсэнээр тэд 2024 оноос эхлэн өдрийн олборлолтоо 1.4 сая баррелиар бууруулахаар зорьж байгаа гэсэн байна.
Газрын тос Экспортлогч Орнуудын Байгууллагын хувьд дэлхийн түүхий газрын тосны 40 орчим хувийг бүрдүүлдэг тул тэдний шийдвэр газрын тосны олон улсын зах зээл дэх үнэд ихээхэн нөлөө үзүүлдэг юм.
Тийнхүү олборлолтыг танах тухай мэдээ гарсан даруй даваа гарагийн өглөө Ази тивд нэг баррель газрын тосны үнэ 2.4 хувиар өссөн байна.
Үйл явдлын хүрээнд ОХУ-ын Шадар сайд Александер Новакийн мэдэгдсэнээр Газрын тос Экспортлогч Орнуудын Байгууллага өнгөрөгч оны аравдугаар сараас хойш өдрийн олборлолтоо 3.66 сая баррелиар бууруулсан гэжээ.
Эх сурвалж: BBC