Ажил олгогчид хиймэл оюун ухаан бүхий чатботын хэрэглээг хязгаарлаж байгаа энэ үед Apple компани тэдний эгнээнд нэгджээ. Үүний шалтгаан нь ажил олгогчдын зүгээс ажилтнууд хиймэл оюун ухаан ашиглаж байхдаа байгууллагын нууцын зэрэглэлтэй мэдээ мэдээллийг санамсаргүй байдлаар алдах боломжтой гэж болгоомжилж байгаатай холбоотой гэнэ.

Улмаар SHRM хүний нөөцийн холбооноос ямар, ямар ажил олгогч ямар шалтгааны учраас хиймэл оюун ухааны хэрэглээг хязгаарлаж байгааг жагсаажээ. Үүнтэй танилцвал:

Мэдээлэл алдагдах. Уолл Стрит Журнал сониноос мэдээлснээр JPMorgan Chase, Verizon гэх компаниуд хиймэл оюун ухаан бүхий ChatGPT технологийн хэрэглээг дотооддоо бүрэн хориглосон бол Amazon компани инженерүүддээ өөрсдийн хөгжүүлсэн хиймэл оюун ухааныг ашиглахыг уриалсан байна. Учир нь хиймэл оюун ухаан хэрэглэгч ямар нэг өгөгдөл оруулахад өгөгдлийг тэд хөгжүүлэгчид рүүгээ нийлүүлдэг тул ажилтнууд санамсаргүй байдлаар нууцын зэрэглэлтэй мэдээлэл алдах боломжтой юм.

Өгөгдлийн аюулгүй байдлыг эрсдэлд оруулах. The Verge мэдээллийн сайтаас мэдээлснээр Samsung компани саяхан дотооддоо болон компани дээр бүртгэлтэй төхөөрөмжүүдийг ашиглан хиймэл оюун ухаан хэрэглэхийг хориглосон бөгөөд үүний шалтгаан нь тэд нууцын зэрэглэлтэй мэдээллийг хиймэл оюун ухаан бүхий талбарт байршуулах нь байгууллагын аюулгүй ажиллагаанд халдсан хэрэг болно гэж үзсэнтэй холбоотой гэжээ.

Үйл явдлын хүрээнд SHRM хүний нөөцийн холбооноос зөвлөснөөр ажил олгогчид хиймэл оюун ухааны хэрэглээний хүрээнд дотоод журам батлах хэрэгтэй ба ажилтнууддаа тэдний үүрэг оролцоо одоо ч чухал гэдгийг мэдрүүлэх хэрэгтэй гэсэн юм.

Эх сурвалж: SHRM