Гадаадын томоохон хэвлэл мэдээллийн хэрэгслүүд 18-ны өдөр НАТО-гийн холбоотнуудын консорциумын зүгээс Инновацийн сангаар дамжуулан Европын батлан хамгаалах салбарын дөрвөн гарааны компанид нэг тэрбум еврогийн хөрөнгө оруулалт хийхээр болсон талаар онцолжээ.
НАТО-гийн Инновацийн сан мөн өдөр Европын дөрвөн технологийн компанид шууд хөрөнгө оруулалт хийсэн ба энэ нь батлан хамгаалах, аюулгүй байдал, уян хатан байдлын асуудлыг шийдвэрлэхэд туслах болно гэж мэдэгдлээ.
Энэ удаад хөрөнгө оруулалт хийсэн компаниудын тоонд Британийн чип үйлдвэрлэгч Fractile AI, Германы робот дизайны ARX Robotics, автомашинд зориулсан хөнгөн материал үйлдвэрлэгч Британийн Icomat, сансрын хагас дамжуулагч үйлдвэрлэгч Британийн Space Forge зэрэг компаниуд багтжээ.
"Стратегийн технологид нэвтрэх боломжийг бүрдүүлэх нь НАТО-гийн гишүүн орнуудын нэг тэрбум иргэний аюулгүй, чинээлэг ирээдүйг баталгаажуулах гол түлхүүр юм" гэж Инновацийн сангийн удирдах түнш Андреа Траверсон цохон тэмдэглэсэн байна.
Тэрээр мөн "Батлан хамгаалах технологийн хувьд геополитикийн шалтгааны улмаас сүүлийн 3-4 жилийн хугацаанд зах зээл нь огцом өссөөр байна. Энэ хандлага АНУ-д харьцангуй эрт эхэлсэн бол Европ одоо маш хурдацтайгаар араас нь “нэхэж” байна” гэжээ. Тодруулбал, тэрээр 2022 оны эцсээр зах зээлийн үнэлгээ нь 7 тэрбум ам.долларт хүрсэн хэмээн мэргэжилтнүүдэд хүлээн зөвшөөрөгдөж 1.5 тэрбум ам.долларын хөрөнгө оруулалт татсан Америкийн батлан хамгаалахын Аnduril компанийн өрсөлдөгч Европоос ч төрөх магадлалтай гэдгийг дурдсан байна.
ОХУ Украинд түрэмгийлсний дараахан НАТО Инновацийн санг үүсгэн байгуулж, батлан хамгаалах салбарыг бэхжүүлэх технологид хөрөнгө оруулахаа мэдэгдэж байсан билээ. Тус сан нь НАТО-гийн гишүүн 32 орны 24-ийнх нь дэмжлэгтэйгээр үйл ажиллагаагаа явуулдгаас гадна Alpine Space Venture, OTB Venture, Join Capital, V Squared Venture зэрэг венчур капиталын фирмүүдтэй хамтран ажилладаг аж.
Эх сурвалж: Asiae
