Америкийн санхүүгийн гол дүүрэг Уолл Стритэд байрладаг, санхүүгийн үйлчилгээний тэргүүлэгч компаниудын нэг Morgan Stanley ойрын долоо хоногт олон улсад өргөн хүрээний цомхотгол зохион байгуулах гэж байна.

Дэлхий дахинд инфляц өсөн, эдийн засаг удааширч буйн улмаас тус бизнесийн үйл ажиллагаа дагаад хумигдаж байна. Тухайлбал, Morgan Stanley-ийн гуравдугаар улирлын ашиг 30 хувиар буурсан. Улмаар өрсөлдөгч банк Goldman Sachs болон Deutsche Bank нарын адил өргөн хүрээний цомхотгол эхлүүлэхээр төлөвлөж байна. Энэ оны гуравдугаар улирлын мэдүүлгийн дагуу Morgan Stanley дэлхийн хэмжээнд 81,567 ажилтантай байна. Тус цомхотгол одоогийн байдлаар 10 хүрэхгүй хувийг хамрахаар төлөвтэй байна хэмээн нэрээ нууцлахыг хүссэн ойрын гурван эх сурвалж мэдээллээ.

Одоогоор Ази, Номхон далайн бүс нутгийн салбаруудаас цомхотгох ажилтнуудын жагсаалтыг гаргаад байгаа аж. Тус цомхотголд ихэвчлэн Хятадтай холбоотой бизнест төвлөрч ажилладаг олон улсын баг, ажилтнууд өртөхөөр байна. Мөн Хонконг болон эх газрын Хятад дахь хөрөнгийн зах зээлийн багуудыг цөөлнө. Morgan Stanley цомхотголын цар хүрээ, цаг хугацааг эцэслэн шийдээгүй байгаа тул тус мэдээллийг одоогоор нууцалж байна.

Эх сурвалж: Reuters