Филиппиний цэргийн генерал Ромео Бравнер Жр өчигдөр/07.04/ “Өмнөд Хятадын тэнгист дахин Хятадын эргийн харуулынхны халдлагад өртөх юм бол ижил байдлаар хариу хүч хэрэглэн өөрсдийгөө хамгаалах болно. Жишээлбэл, Хятадын тал хутга баривал манай цэргүүд ч мөн хутга барина. Дахиж дээрэлхүүлэхгүй” хэмээн мэдэгджээ.

Мөн тэрээр Хятадын талаас хоёр завь эвдсэний төлбөрт нэг сая ам.доллар, болон хурааж авсан долоон галт зэвсгийг буцаан өгөхийг шаардсан байна.

Түүнээс гадна зарим эх сурвалжийн мэдээлж байгаагаар Филиппиний арми зургаадугаар сарын 17-нд болсон мөргөлдөөний улмаас баруун гарын эрхий хуруугаа алдсан цэргийн эмчилгээний төлбөрийг нэхэмжилж магадгүй гэнэ.

Эргэн санавал, зургаадугаар сарын 17-нд Хятадын эргийн харуулынхан Филиппиний завь руу халдсан явдал болсон билээ. Болсон явдлын гэрэл зураг, дүрс бичлэгүүдээс харахад Хятадын цэргүүд сүх, илд, үзүүртэй зэвсгээр зэвсэглэсэн байж. Мөргөлдөөнөөс болж хэд хэдэн цэрэг шархдаж, нэг цэрэг эрхий хуруугаа алдсан билээ.

Эх сурвалж: Associated Press