Английн “Ливерпүүл” клуб одоогоор “Реал Сосьедад” багт тоглож буй хагас хамгаалагч Такэфүша Кубо-той гэрээ байгуулахаар төлөвлөж байгаа тухай Японы Sponichi сонинд бичжээ.
Ливерпүүлийн удирдлага өдгөө 23 настай Японы хөлбөмбөгчнийг багтаа авахын тулд Испанийн клубт 65 сая еврог санал болгож байгаа бөгөөд гэрээ байгуулсан тохиолдолд Кубо жилд 15 сая еврогийн цалин авах юм.
Хагас хамгаалагч Кубо “Реал Сосьедад” багт 2022 оны 7 дугаар сараас хойш тоглож байгаа бөгөөд түүнтэй байгуулсан гэрээ 2029 оны 6 дугаар сарын сүүлчээр дуусгавар болно. 2023/2024 оны улиралд тэрбээр тус багийн бүрэлдэхүүнд 41 тоглолтонд оролцохдоо 7 гоол оруулж, 5 оновчтой дамжуулалт хийжээ.
Transfermarkt цахим хуудсанд бичсэнээр бол, Ливерпүүлтэй гэрээ байгуулсан тохиолдолд Т.Кубо Японы түүхэн дэх хамгийн үнэ цэнтэй, хамгийн өндөр цалинтай хөлбөмбөгчин болох юм.
Эх сурвалж: МОНЦАМЭ