Нэг улирлын хугацаанд 1 тэрбум еврогоос дээш орлого олсон түүхэн дэх анхны хөл бөмбөгийн клуб нь Мадридын “Реал” боллоо. Энэ тухай тус клубын хэвлэлийн алба мэдээлжээ.

Тоглогчдын шилжилт хөдөлгөөнтэй холбоотой мөнгөний эргэлтийг тооцохгүйгээр “Реал”-ын үйл ажиллагааны орлого €1,073 болсон нь өмнөх оныхтой харьцуулахад 27 хувиар илүү байна. Өмнөх 2022/2023 оны улиралд тус клубын орлого 843 сая евро байсан юм. Харин санхүүгийн жилийн цэвэр ашиг нь 16 сая еврод хүрч, өмнөх оны үзүүлэлтээс 32 хувиар давжээ. Түүнчлэн клубын өөрийн хөрөнгөний хэмжээ 547,1 сая евро болсон нь өмнөх улирлынхтай харьцуулахад 16 сая еврогоор нэмэгджээ.

Санхүүгийн тайланд тус клубын "Сантьяго Бернабеу" цэнгэлдэх хүрээлэнг шинэчлэх төслийн санхүүжилтийг тусгаагүй байна.

Сануулан дурдахад, 2023/2024 оны улиралд тус клуб Аваргуудын лигт түрүүлж, Испанийн аварга шалгаруулах тэмцээнд 95 оноотойгоор аваргалж, Испанийн Супер цомын эзэн болсон билээ.

Саяхан тус клуб 25 настай Францын довтлогч Килиан Мбаппег 5 жилийн гэрээгээр эгнээндээ элсүүлсэн юм.

2024/2025 оны улирлын Испанийн аварга шалгаруулах тэмцээн 8 дугаар сарын 15-нд эхлэх бөгөөд “Реал Мадрид” баг 18-ны өдөр “Мальорка” клубын талбайд эхний тоглолтоо хийнэ.

Эх сурвалж: МОНЦАМЭ