Өчигдөр буюу даваа гарагт Наран дээр хамгийн өндөр буюу Х зэрэглэлийн дэлбэрэлт болсныг ОХУ-ын Холбооны төсөвт байгууллага болох Геофизикийн хавсарга судалгааны хүрээлэнгийн эрдэмтэд бүртгэн авчээ.

“Москвагийн цагаар наймдугаар сарын 5-ны өдрийн 13:40 цагт Нарны 3767 (S10W88) бүлэг толбоны рентген давтамжийн хязгаар дотор Х1.7 зэрэглэлийн дэлбэрэлт 30 минутын хугацаанд болсныг бүртгэн авлаа. Дэлбэрэлтийн дүнд II спектр хэлбэрийн (V=171 км/ сек) цацраг идэвхт туяа ялгарсан “ гэж хүрээлэнгийн мэдээлэлд дурдсан байна.

Үүний зэрэгцээ M1.0, M1.2/SF, M6.1/1N, M1.7 зэрэглэлийн дэлбэрэлтүүд бүртгэгджээ.

Наран дээр болж буй дэлбэрэлтүүдийг цацраг идэвхт туяаны ялгаралтаас хамааруулан A, B, C, M ба X гэсэн 5 зэрэглэлд хуваадаг байна. Хамгийн доод ангилал буюу A0.0 нь Дэлхийн тойрог замын 1 хав.дөр.м талбайд 10 нВт хэмжээний туяа ялгарч буйг тодорхойлдог бөгөөд зэрэглэлийг заасан нэг үсэгнээс нөгөө үсэгт шилжихэд туяаны хүчин чадал 10 дахин нэмэгддэг ажээ. Наран дээр дэлбэрэлт болсноор Нарны плазм цацагддаг бөгөөд плазман үүл Дэлхийд хүрч ирснээр соронзон шуурга үүсдэг байна.

Энэ оны тавдугаар сарын эхээр Нарны плазм цацагдсанаар 2005 оноос хойш үзэгдээгүй соронзон шуурга үүсэж, улмаар тавдугаар сарын 11-ний өдөр хамгийн дээд буюу G5 түвшинд хүрсэн билээ.

Эх сурвалж: МОНЦАМЭ