Даваа гарагт АНУ-ын ерөнхийлөгч Жо Байден Афганистанаас цэргээ татан гаргах шийдвэр нь АНУ-ын хувьд зөв байсан гэдгийг дахин хэлжээ.

Тэрээр, “Би өөрийн шийдвэртээ бат зогсож байна. Тэндээс цэргээ гаргаж авахад хэзээ ч тохиромжтой цаг байдаггүйг 20 жилийн дараа би хэцүү аргаар ойлголоо” гэж хэлсэн байна.

Хэдийгээр Жо Байден Талибанчуудын эзлэн түрэмгийлэл төсөөлснөөс нь хурдан болсныг хүлээн зөвшөөрч байсан ч АНУ бүхий л боломжит үр дагаврыг тооцож үзсэн харин Афганы зэвсэгт хүчин муу ажилласан хэмээжээ.

Жо Байден:

-Үнэн гэвэл тэд бидний төсөөлснөөс илүү хурдан хөдөлсөн. Тэгээд юу болсон бэ? Афганистаны улс төрийн удирдагчид бууж өгч, улсаасаа дүрвэсэн. Афган цэргүүд зарим нөхцөлд тулалдах ч үгүй бууж өгсөн.

Афган улсын цэргүүд өөрсдөө тулалдах ч хүсэлгүй байхад Америк цэргүүд тэдний өмнөөс дайнд тулалдаж, амь эрстэж болохгүй гэдгийг хэлжээ.

Ерөнхийлөгч Жо Байденд тус нөхцөл байдлаас үүдэн ихээхэн шүүмжлэл ирж байгаа билээ. Хэдий тийм ч тэрээр шийдвэр гаргах эрхийг өөр нэг ерөнхийлөгчид дамжуулахын оронд шүүмжлэлийг хүлээн авахыг илүүд үзэх болно гэдгээ илэрхийлсэн байна.

АНУ-ын зүгээс цаашид ч бүс нутгийн дипломат харилцааг үргэлжлүүлж, Афганы ард иргэдийн үндсэн эрхийн төлөө дуугарах болно хэмээжээ.

Түүнчлэн хэрэв Талибанчууд Кабулын нисэх буудал дахь цэргийн ажиллагаанд саад учруулах, Нэгдсэн улсын албан хаагчийн биед халдах тохиолдолд хүч хэрэглэх болно хэмээн тангарагласан байна.

Басхүү Афганистаны дайн удаан хугацаанд үргэлжлэх нь АНУ-ын стратегийн өрсөлдөгчид болох Орос, Хятад улсад илүү ашигтай болохыг хэлсэн юм. Тэрээр “Тэд АНУ-ыг Афганистаны тодорхойгүй байдлыг тогтворжуулахын тулд хэдэн тэрбум доллароо шавхахыг харахдаа таатай байх болно” хэмээжээ.

Эх сурвалж: DW