Калифорни мужид сүүлийн хэдэн сарын турш ой хээрийн түймэр дэгдэж байгаагаас үүдэн 40 гаруй мянган оршин суугчдыг нүүлгэн шилжүүлэх тухай захирамж мужийн захиргаанаас гаргажээ.

Түүнчлэн хээрийн түймрийн утаа салхинд тархаж, ойролцоох бүс нутгуудын оршин суугчдын эрүүл мэндэд заналхийлж байгаа аж.

Орон нутгийн цагаар 24-ний өдөр CNN-ийн мэдээлснээр, энэ зун Калифорнийн хойд хэсэгт тархсан 9 том хэмжээний ой хээрийн түймрийн улмаас 615 хувийн орон сууц сүйдэж, 42,000 гаруй оршин суугчдыг нүүлгэн шилжүүлэхээр болсон тухай онцолжээ.

Ой хээрийн түймэр маш хурдацтай тархаж, хот суурин газруудад хүртэл аюул учруулж эхэлснээр цахилгаан болон хийн хангамж зарим бүс нутагт тасалдсан байна.

Одоогийн байдлаар 2000 гаруй гал сөнөөгчид түймрийг унтраахаар ажиллаж байгаа хэдий ч үр дүнд хүрэхгүй байгаа тул мужийн амбан захирагч Гэвин Ньюсом АНУ-ын Ерөнхийлөгч Жо Байденээс тус бүс нутгийг гамшгийн онц аюултай бүс болгон зарлахыг хүссэн байна.

Энэ он гарсаар Калифорни мужид гарсан түймрийн улмаас 1.57 сая акр газар (6353 км2) шатсан байна. Энэ нь өнгөрсөн оны мөн үед дэгдэж байсан ой хээрийн түймрээс даруй 460,000 акр газраар (1861 км2) илүү хохирол учруулаад буй үзүүлэлт юм.

Харамсалтай нь энэхүү хохиролын хэмжээ цаашид ч нэмэгдэх хандлагатай байгаа гэнэ. Учир нь жил бүрийн 10, 11-р саруудад ой хээрийн түймэр хамгийн ихээр гардаг үе юм.

Эх сурвалж: KBS