Талибанчууд барууны загварыг дагасан хувцас хэрэглээтэй хүмүүсийг шийтгэж байна гэх мэдээ гарахтай зэрэгцэн афгани залуус жинс өмссөнийхөө хариуд ташуурдуулжээ.
Фэйсбүүк хуудаснаа ихээхэн хандалт аваад буй постноо нэгэн афгани залуу өөрийг нь болоод найзуудыг нь талибанчууд Исламын шашныг үл хүндэтгэсэн гэж буруутгаж, бууны хошуу тулган зодож, ташуурдсан хэмээжээ.
Залуугийн хэлж байгаагаар түүнийг найзуудтайгаа Кабул хотын гудмаар алхаж явахад талибанчууд тэднийг саатуулж, зарим нь зугтаж чадсан ч үлдсэн нь талибанчуудын дайралтад өртсөн гэнэ.
Талибанчуудын өмнөх засаглалын үед “баруунжсан” хувцас өмссөнийхөө хариуд дайралтад өртөж, хүндээр гэмтэл авч, зарим тохиолдолд амиа алдсан тухай мэдээлэл ихээхэн тархаад байсан билээ.
Тэгвэл энэ удаад талибанчууд илүү шинэлэг аргаар засаглах болно гэж амлаж байсан ч Шаритын хуулийг улсдаа мөрдүүлнэ гэж хэлснээс улбаалан афганичууд болоод олон улсын хүрээнд ихээхэн зовнил дагуулж байгаа юм.
Тэдний зовнил үнэн болохыг батлах шиг талибанчууд Афганистаны засгийн эрхийг булааснаас хойш подволк, жинс өмссөн залуус зодуулсан хэд хэдэн хэрэг гарсан билээ.
Түүнчлэн Афганистан улсын Этилаатроз сонины газраас мэдээлж байгаагаар тэдний сэтгүүлчид ч афгани хувцас өмсөөгүйгээс болж дайралтад өртсөн хэмээжээ.
Одоогоор хэдий эрэгтэйчүүдийн юу өмсөж болох, болохгүйг заасан журам гараагүй байгаа ч ийнхүү барууны хэв маяг шингэсэн хувцас хэрэглэлийг талибанчууд хориглож байж болзошгүй ажээ.
Улмаар ийнхүү эрэгтэйчүүдийн өмсөх хувцас хэрэглэлийн асуудалд оролцож байгаагаас үзвэл, талибаны засаглал дор эмэгтэйчүүдийн эрх хэрхэх нь тун бүрхэг байгаа юм.
Одоогийн байдлаар Кабул болон бусад хотуудад охид бүсгүйчүүд ажлаасаа албан хүчээр гарч байгаа ба Шаритын хуулийн дагуу бурка өмсөх шаардлага үүссэн тул бурканы үнэ хоёроос гурав дахин өсөөд байгаа ажээ.
Эх сурвалж: UNILAD