Pfizer болон BioNtech компаниудын хамтран бүтээсэн Ковид-19 өвчний эсрэг вакцин 5-11 насныханд үр дүнтэй болохыг судалгаагаар тогтоожээ.
АНУ-ын Pfizer компанийн зүгээс орон нутгийн цагаар 20-ны өдөр хэвлэлийн бага хурал хийж, эмнэлзүйн туршилтын үр дүнг нийтэд мэдээлсэн бөгөөд аюулгүй байдлыг баталгаажуулсан гэж мэдэгджээ.
Тус эмнэлзүйн туршилтыг өсвөр үеийнхэн болон насанд хүрэгчдэд зориулсан стандарт тунгийн гуравны нэгтэй тэнцэх хэмжээний тунг 3 долоо хоногийн интервалаар цэцэрлэгийн насны болон бага ангийн 2268 сурагчдад хийж үр дүнг ажигласан байна.
Үүний үр дүнд хүүхдүүдэд вакцины хоёр дахь тунг хийсний дараа өсвөр насныхан болон насанд хүрэгчдийнхтэй адил вирусын хүчтэй эсрэг биет үүссэн хэмээн мэдэгджээ. Pfizer компанийн зүгээс мөн вакцины аюулгүй байдлын тухайд ч судалгааг хийсэн гээд өсвөр насныханд түгээмэл тохиолдож байсан тариулсан хэсэгт өвдөх, халуурах гэх зэрэг гаж нөлөө нь судалгаанд оролцсон бага насны хүүхдүүдэд маш бага хувьтай ажиглагдсан байна.
Тус компани ойрын хугацаанд АНУ-ын Хүнс, эмийн захиргаанаас энэ насны бүлгийнхэнд вакцин хийх зөвшөөрлийг авахаар төлөвлөж байна.
Уг вакциныг одоогоор АНУ-д 16 ба түүнээс дээш насныханд, 12-15 насныханд шаардлагатай тохиолдолд хэрэглэхийг зөвшөөрсөн байна. АНУ-аар тогтохгүй барууны олон орнууд Ковид-19 өвчний эсрэг вакциныг 12 ба түүнээс дээш насныханд хийлгэхийг зөвшөөрсөн юм.
Эх сурвалж: SBS