Майкрософт компанийг үүсгэн байгуулагч Билл Гэйтсийн удирддаг цэвэр эрчим хүчний төсөл 1 тэрбум гаруй ам.долларын санхүүжилтийг босгожээ.
Гадаадын томоохон хэвлэлүүд 20-ны өдөр мэдээлснээр, дэлхийн хөрөнгийн менежментийн компани болох BlackRock -ийн буяны сан таван жилийн хугацаанд Breakthrough Energy Catalyst цэвэр эрчим хүчний төсөлд 100 сая долларын хөрөнгө оруулалт хийхээ амласан байна. Мөн дэлхийн хамгийн том ган үйлдвэрлэгч АrcelorMittal болон American Airlines Group компаниуд 100 сая долларын хөрөнгө оруулалт тус тус хийхээр төлөвлөж байгаа аж. Нэмж дурдахад одоогийн байдлаар Microsoft, General Motors, Bank of America, Boston Consulting Group зэрэг томоохон корпорациуд хөрөнгө оруулагчаар хамтран ажиллаж буй юм.
Breakthrough Energy Catalyst төсөл нь дэлхийн уур амьсгалын өөрчлөлтийг шийдвэрлэх дөрвөн үндсэн шийдлийг арилжаалах, зардлын өрсөлдөх чадварыг сайжруулах зорилгоор Билл Гейтсийн үүсгэн байгуулсан төр, хувийн хэвшлийн түншлэлийн төсөл юм. Хөрөнгө оруулалтын гол чиглэлүүд нь ногоон эх үүсвэр, агаарын хөлгийн тогтвортой түлш, урт хугацаанд эрчим хүч хуримтлуулах болон нүүрстөрөгч цуглуулах зэрэг багтдаг юм.
Билл Гейтс өнгөрсөн сард АНУ-ын Засгийн газрын зүгээс баталсан уур амьсгалын өөрчлөлтийн эсрэг дэд бүтцийн төсөвт 1.5 тэрбум ам.долларын хөрөнгө оруулахаа амласан байна. BlackRock компанийн Гүйцэтгэх захирал Лоуренс Пинк "Бид мөнгө олохын тулд үүнийг хийж байгаа юм биш." гээд “Төслийн хэрэгжилтийг аль болох хурдан бөгөөд үр дүнтэй болгохын тулд хичээн ажиллана.” гэжээ.
Билл Гейтс хэлэхдээ, төсөл ирэх жилээс хэрэгжиж эхлэх бөгөөд 20 орчим компанийг гол түншээр элсүүлэн тус төслийн нийт төсвийг 3 тэрбум долларт хүргэх төлөвлөгөөтэй байгаа гэжээ.
Эх сурвалж: Asian Economy