Барселона клубийн хамгаалагч Жерард Пике хөл бөмбөгийн спортоос зодог тайлах болжээ. Тэрээр энэ хагас сайн өдөр Ноу Камп цэнгэлдэхэд сүүлийн тоглолтоо хийх юм.
Өдгөө 35 настай тэрээр энэхүү мэдэгдлээ өөрийн цахим хуудаснаа дүрс бичлэг хэлбэрээр нийтлэн оруулсан байна.
Түүний сүүлийн тоглолт Ла Лигийн тоглолт байх бөгөөд Барселона клуб Алмериагийн эсрэг тоглох юм. Пикегийн хэлснээр, “Би үргэлж Барсагаас цааш баг байхгүй байх болно гэж хэлдэг байсан, яг л тэр хэлснээр минь болох нь.
Хөл бөмбөг надад бүхнийг өгсөн. Барса ч өгч болох бүх зүйлийг өгсөн. Миний шүтэн бишрэгч та бүхэн надад бүгдийг өгсөн.
Харин одоо тэр л жаахан Пикегийн бүх хүсэл нь биелсэн болохоор би та бүхэнд энэхүү аяллаа дуусгаж буйгаа мэдэгдэхээр шийдлээ.
Та бүхэн намайг мэднэ. Би эрт орой хэзээ нэг цагт эргэж ирэх л болно. Ноу Камп цэнгэлдэхэд уулзацгаая! Барса урт наслаг! Үргэлж” гэсэн байна.
Эх сурвалж: BBC