Франс Пресс агентлагийн мэдээлснээр, Израиль болон Хамас бүлэглэлийн хооронд дэгдсэн дайны улмаас хүнд байдалд байгаа Газын зурвас орчмын оршин суугчдад тусламжийн бараа хүргэх боломжийг олгох үүднээс Египетээс Газын зурвас хүртэлх хилийн шалган нэвтрүүлэх боомтыг 20-ны өдөр нээхээр болсон талаар онцлов.
Египетийн засгийн газрын мэдлийн Аль-Кахира телевизээс иш татан орон нутгийн цагаар 19-ний өдөр тус мэдээнд дурдсанаар “Палестины ард түмэнд хүмүүнлэгийн тусламж хүргэхийн тулд Рафах хилийн шалган нэвтрүүлэх боомтыг баасан гарагт нээх болно” хэмээн өгүүлсэн байна.
Газын зурвасын өмнөд хэсэг болон Египетийг холбосон бараг цорын ганц гарц болох Рафах шалган нэвтрүүлэх боомтын өмнө дэлхийн улс орнууд болон олон улсын байгууллагуудаас хүргэгдсэн 150 гаруй ачааны машин бүхий тусламжийн бараа зорьсон газартаа хүрэхээр ар араасаа дугаарлан зогссон байдалтай байгаа аж.
АНУ-ын ерөнхийлөгч Жо Байдены өмнөх өдөр нь Израильд хийсэн айлчлалын дараахан Израиль болон Египет улсууд Газын зурваст хүмүүнлэгийн бараа бүтээгдэхүүн нэвтрүүлэх тухай нөхцөлт тохиролцоонд хүрсэн байна.
Израилийн тал зөвхөн хүнс, ус, эм тариа оруулах шаардлагыг тавьсан бөгөөд тусламжаар орж ирсэн бараа бүтээгдэхүүнүүд Хамас бүлэглэлийнхэний гарт орохгүй байх ёстой гэх зэрэг нөхцлийг тавьжээ.
Египет улсын зүгээс тусламжийн бараа бүтээгдэхүүний цувааг аюулгүй нэвтрүүлэх зэрэг “аюулгүй байдлын баталгаа"-г шаардсан байна.
Эх сурвалж: YTN