Дэлхийн чансааг тэргүүлж буй Сербийн теннисчин Новак Жокович хорват дасгалжуулагч Горан Иванишевичтэй цаашид хамтран ажиллахаа зогсоох шийдвэр гаргасан гэдгээ инстаграм хуудсандаа мэдээлжээ.
"Горан бид хоёр хэд хоногийн өмнө хамтын ажиллагаагаа дуусгахаар шийдсэн. Бид талбай дээр өгсөж, уруудаж байсан ч бидний нөхөрлөл үргэлж хүчтэй байсан" гэж Жокович бичээд хамтдаа амжилтад хүрсэнд Иванишевичид талархал илэрхийлжээ.
Иванишевич 2018 оноос хойш түүнийг дасгалжуулжээ. Өнгөрсөн хугацаанд Сербийн теннисчин Австралийн нээлттэй тэмцээнд (2019, 2020, 2021, 2023) дөрвөн удаа, Францын нээлттэй тэмцээнд (2021, 2023) хоёр удаа, Уимблдонд (2018, 2019, 2021, 2022) дөрвөн удаа, АНУ-ын нээлттэй тэмцээнд (2018, 2023) хоёр удаа түрүүлсэн байна.
Өдгөө 52 настай Иванишевич мэргэжлийн теннисчдийн холбооноос зохион байгуулдаг 22 тэмцээнд түрүүлсэн бөгөөд дэлхийн чансааны хоёрдугаарт бичигдэж байсан юм. 2001 онд тэрбээр Уимблдонд түрүүлж байв. Мөн 1992 онд ганцаарчилсан ба хосын төрөлд хүрэл медаль хүртсэнээр Олимпын хос медальтан болсон юм.
Эх сурвалж: Championat /МОНЦАМЭ агентлаг/