ХБНГУ-ын Франкфуртын нисэх онгоцны буудлын буух зурвасын ойролцоо цаг уурын тэмцэгчид эсэргүүцлийн жагсаал зохион байгуулсны улмаас нислэгийг түр хугацаагаар зогсоохоос аргагүйд хүрсэн талаар Ройтерс агентлаг мэдээллээ.
Тус мэдээнд дурдсанаар орон нутгийн цагаар 25-ны өглөө Германы байгаль орчныг хамгаалах "Сүүлчийн үе" бүлгэмийн зургаан идэвхтэн нисэх онгоцны буудлын хашааг сэтэлж, хөөрөх зурвас руу нэвтэрсэн гэв.
Тэд "Газрын тос хүний амийг авч одож байна" гэсэн бичиг бүхий самбар барьж эсэргүүцлээ илэрхийлсэн нь нислэгийн үйл ажиллагааг тодорхой хэмжээгээр түр зогсооход хүргэжээ.
Энэхүү байгаль орчны бүлгэм нь 2030 он гэхэд газрын тос, байгалийн хий, нүүрс зэрэг чулуужсан түлшнээс татгалзах олон улсын гэрээг хэрэгжүүлэхийг Германы засгийн газраас шаардаж байгаа бөгөөд Европ, Хойд Америк даяар эсэргүүцлийн хөдөлгөөн өрнүүлнэ гэдгээ мэдэгдээд байгаа юм.
Үүнээс өмнө буюу 24-ний өдөр баруун Германы Кельн Бонн нисэх онгоцны буудалд суулт хийж байсан тус бүлгэмийн идэвхтнүүд нисэх зурваст наалдамхай бодисоор өөрийгөө нааж, гурван цаг орчим нислэгийн үйл ажиллагааг саатуулсан удаатай.
Эх сурвалж: SBS
