ОХУ-ын Ерөнхийлөгч Владимир Путин Талибан бүлэглэлийг Афганистаны удирдагч хэмээн албан ёсоор хүлээн зөвшөөрөхөө яаравчлан шийдэх хэрэггүй хэмээн мэдэгдэв.
Aссошиэйтед Пресс болон Tасс зэрэг гадаадын хэвлэл мэдээллийн хэрэгслүүдийн мэдээлснээр, орон нутгийн цагаар 15-ны өдөр Ерөнхийлөгч Путин Тусгаар Улсуудын Хамтын Нөхөрлөлийн удирдагчидтай цахим уулзалт хийх үеэрээ "Талибанчуудын байгуулсан шилжилтийн засгийн газар нь Афганистан улсын бүх бүс нутгийг хамарч чадахгүй байгаа” гэж онцолсон юм. Тэрээр үргэлжлүүлэн “Та бүхэн тэдэнтэй харилцах шаардлагатай байгааг ойлгож байна, гэхдээ яарах хэрэггүй" гэж хэлээд "Бид энэ талаар хамтдаа ярилцах хэрэгтэй” гэжээ. “Бид Афганистан дахь зөвшилцлийн үйл явцыг дэмжиж, тус улсын нөхцөл байдлыг хэвийн болгоход туслах ёстой" гэж тэрээр мөн нэмж хэлэв.
ОХУ-ын засгийн газрын зүгээс энэ сарын 20-ны өдөр Талибан болон Афганистаны бусад бүлэглэлийг Москвад урьж, Афганистан улсын улс төр, нийгмийн байдлыг хэвийн болгох талаар яриа хэлэлцээ хийхээр төлөвлөж байгаа аж. Гэсэн хэдий ч энэ үеэр Путин өөрөө Талибаны төлөөлөгчидтэй уулзах бодолгүй байгаагаа хэлжээ.
ОХУ нь хуучин ЗХУ-ын үед Афганистан улстай бүтэн 10 жилийн турш дайтаж байсан бол өнгөрөгч 8-р сард Талибан бүлэглэл тус улсад хяналтаа тогтоосны дараа нийслэл Кабул хот дах элчин сайдын яамаа хэвийн ажиллуулж буй цөөн орнуудын нэг болоод буй юм.
Эх сурвалж: Yonhap