Ням гарагт Эл Сальвадор улсад 4000 орчим хүн ерөнхийлөгч Букелегийн засгийн газрыг эсэргүүцэн жагсжээ.

Тус улсын ерөнхийлөгч Наяиб Букеле өнгөрсөн сард биткоиныг улсын албан ёсны төлбөрийн хэрэгслээр тооцох тухай хуулийг баталснаас хойш ард иргэдээсээ ихээхэн шүүмжлэл хүлээх болсон юм. Гэвч тэрээр эсэргүүцлийг хүлээн авалгүй харин ч өөрийгөө “хамгийн янзтай дарангуйлагч” гэж тодорхойлоод амжсан байна.

Сан Сальвадорын гудамжаар алхах жагсагчид биткоиныг төлбөрийн хэрэгслээр зөвшөөрөх тухай хуулийг эсэргүүцэж байгаагаа илэрхийлсэн лоозон, үзүүлэн барьж явсан юм. Түүнчлэн Дээд шүүхийг огцрохыг шаардаж, Букелег дахин ерөнхийлөгчид дэвшихийг эсэргүүцэж байгаагаа ч илэрхийлжээ. Одоогоор Букеле ерөнхийлөгчийн сонгуульд дахин өрсөлдөх эсэх нь тодорхойгүй байгаа ч магадлал өндөр байгаа юм.

Жагсагчид гудамжаар алхахдаа, “Эл Сальвадор улс юу хүсэж байна вэ? Дарангуйлагчийг зайлуулахыг хүсэж байна” хэмээн хоолой нийлүүлэн орилж явсан байна. Мөн Букелетэй төстэй хүүхэлдэй ч урлаж, шатаажээ.

Харин жагсаалын хариуд Букеле “бүтэлгүйтэл” хэмээн тодорхойлсон юм. Тэрээр, “Жагсаал бол бүтэлгүйтэл гэдгийг тэд мэдэж байгаа. Энд хэн ч тэдэнд итгэхээ больсон” хэмээжээ.

Эх сурвалж: The Hill