Франц улсын экологийн шилжилтийн яамнаас эрчим хүчний хэрэглээний хүрээнд хоёр ч журам батлах болжээ. Тодруулбал, яамны зүгээс эрчим хүчний зохисгүй хэрэглээг танах үүднээс неон гэрэлтүүлгийн хэрэглээг хязгаарлах болсон бөгөөд тус улсад үйл ажиллагаа явуулж буй дэлгүүрүүдийг агааржуулагч ажиллуулж байх үедээ хаалгаа хаахыг шаардсан байна.
Экологийн шилжилтийн сайд Агнес Панниер Руначер “Журнал ду Диманш” буюу ням гарагийн сонинд өгсөн ярилцлагадаа өгүүлснээр, эдгээр журмыг Францын зарим бүс нутагт аль хэдийн мөрдөж эхэлсэн бол удалгүй улс даяар мөрдөх гэнэ.
Улмаар агааржуулагч ажиллуулж байгаа үед дэлгүүрийнхээ хаалгыг нээлттэй орхисон тохиолдолд 750 хүртэлх еврогоор торгох юм.
Хатагтай Руначерын тодорхойлсноор агааржуулагч асаалттай байхад хаалгаа нээлттэй орхих нь утгагүй хэрэг гэсэн байна.
Тийнхүү ойрын хугацаанд холбогдох яамнаас эрчим хүчний зохисгүй хэрэглээг танах тогтоолыг батлах юм.
Мөн тэдний зүгээс зар сурталчилгааны самбарын гэрэлтүүлгийг шөнийн 01:00 цагаас үүрийн 06:00 цагийн хооронд унтраах тухай хоригийн хамрах хүрээг тэлэх болсон байна. Гэхдээ энэхүү хориг нь нисэх буудал болоод галт тэрэгний буудлуудад хамаарахгүй ажээ.
Эх сурвалж: BBC