Даваа гарагт Азийн зах зээлд нэг баррель газрын тосны үнэ 3 гаруй ам.доллароор өсжээ. Үүний шалтгаан нь Израиль улс болон Палестины исламист Хамас бүлэглэлийн хоорондох цэргийн мөргөлдөөн хурцадмал байдалд шилжиж, олон улсын зүгээс газрын тосны нийлүүлэлтэд санаа зовних болсонтой холбоотой юм.

Үйл явдлын хүрээнд Ройтерс агентлагаас мэдээлснээр даваа гарагт Брент Крюдын түүхий газрын тосны үнэ баррель тутамдаа 3.10 ам.доллароор өсөж, нийт 3.67 хувийн өсөлттэйгөөр нэг баррелийн үнэ нь 87.68 ам.доллартой арилжааг нээжээ. Харин Уэст Техас Интермедиатын түүхий газрын тосны хувьд нэг баррелийн үнэ 86.05 ам.долларт хүрсэн нь 3.94 хувь буюу бараг 4 хувийн өсөлттэй байсан бөгөөд баррель тутамдаа нийт 3.26 ам.доллароор өссөн байна.

Бидний мэдээлж байсан дагуу Палестины исламист Хамас бүлэглэл өнгөрөгч бямба гарагт Израилийн өмнөд нутгийг онилон нийт 2,500 гаруй пуужин харваж, гэнэтийн дайралт хийсний улмаас өдгөө дайралтад өртөж амиа алдсан хүмүүсийн тоо 1,100 даваад байгаа билээ. Тэгвэл олон улсын зүгээс эл мөргөлдөөнийг Ойрхи Дорнодын тав дахь дайн болж өргөжиж магадгүй хэмээн анхааруулах болсноор олон улсын зах зээлд газрын тосны үнэ хурдацтай өсөж байгаа нь энэ юм.

Эх сурвалж: The Reuters