АНУ-ын Төлөөлөгчдийн танхимын дарга Нэнси Пелоси Тайваньд айлчлахтай зэрэгцэн эх газрын Хятадын зүгээс Тайванийг тойрсон тэнгист түүхэндээ хамгийн том цэргийн сургуулилт хийх болсноо мэдэгдсэн билээ.

Улмаар өнөөдөр 12:00 цагийн үед галт сургуулилт арлаас 12 милийн зайд хэд хэдэн газар зэрэг эхэлсэн байна.

Эх газрын Хятадын хувьд Тайваньтай хийх зарим худалдаагаа зогсоосон ч арлыг тойрсон армийн бэлтгэл нь тэдний Нэнси Пелосигийн айлчлалыг эсэргүүцсэн хамгийн том хариу болж байгаа юм.

Тайванийн зүгээс армийн бэлтгэлийг тэнгис болон агаарын бүслэлт гэж үзэж байгаагаа илэрхийлсэн бол АНУ-ын Хятадын эл үйлдлийг “хариуцлагагүй, хяналтаас шууд гарч болох” зүйл гэж тодорхойлжээ.

Шинжээч Бонни Линийн анхааруулж байгаагаар энэхүү сургуулилтын нэг аюултай зүйл нь зэвсэгт мөргөлдөөнд хүргэж болох гэнэ.

Лхагва гарагт л гэхэд Тайванийн нутаг дэвсгэр дээгүүр Хятадын байлдааны онгоцнууд ниссэн учир тэд тийрэлтэт хөлгүүдээ хөөргөсөн бол Кинмен арлын дээгүүр үл мэдэгдэх нисдэг биет зорчсонд галт бамбар асаасан байна. Мөн ойрын өдрүүдэд Тайванийн хэд хэдэн яам кибер халдлагад өртсөн хэмээжээ.

Эх сурвалж: Nikkei Asia