Пүрэв гарагт ХБНГУ-д суугаа ОХУ-ын элчин сайдын яамнаас нэгэн мэдэгдэл гаргажээ. Мэдэгдэлд өгүүлснээр ОХУ-аас Европын Холбоо руу гаргах байгалийн хийн хэмжээ буурсан нь Оросын буруутай үйлдлээс болоогүй харин Москвагийн эсрэг тавьсан хоригийн арга хэмжээний үр дүн гэсэн байна.

Мэдэгдлээс үзвэл, “Одоогийн байдлаар ОХУ-ын Европын Холбоо руу гаргах байгалийн хийн хэмжээ мэдэгдэхүйц буурсан байгаа. Үүний шалтгаан нь Оросын буруутай үйлдэл бус харин Оросыг эсэргүүцэх хоригийн арга хэмжээнүүд юм.

Польш улс л гэхэд Ямал-Европын хийн шугамыг хаасан байгаа. Мөн Украин улс өөрийн газар нутгаар дамжуулан гаргах хийн хэмжээг бууруулсан. “Норд Стрим 2” шугамын хувьд ашиглалтад оруулахад 100% бэлэн байгаа бөгөөд шаардлагатай техникийн шалгууруудыг бүгдийг нь давсан. Гэвч улс төрийн шалтгааны улмаас ХБНГУ-ын талаас хийн хоолойг ашиглалтад оруулах зөвшөөрлийг олгохгүй байгаа.

Сүүлийн үед ОХУ-ыг ХБНГУ-д эрчим хүчний хямрал үүсгэж, байгалийн хийг зэвсгийн зориулалтаар ашиглаж байгаа гэж буруутгах болсон юм. Гэвч эрчим хүчний хямрал 2021 онд Ази тивд байгалийн хийн эрэлт нэмэгдэж, Европын түншүүд хийн худалдааг спот зах зээл дээр хийх болсноос эхлэлтэй. Тухайн үед л Европ тив рүү гаргах шингэрүүлсэн байгалийн хийн хэмжээ багасаж, үнэ эрчимтэй өсөх болсон. ОХУ-ын хувьд хийн нийлүүлэлтийн хүрээнд гэрээгээр хүлээсэн үүргээ бүрэн биелүүлж, ХБНГУ-ын зүгээс ч үүнийг баталж байсан” гэжээ.

Эх сурвалж: ТАСС