ОХУ-ын Гадаад хэргийн сайд Сергей Лавров хэрвээ барууны орнууд амлалтаа биелүүлбэл Хар тэнгисийн үр тарианы хэлэлцээрт нэн даруй эргэн орохоо мэдэгджээ. Гэвч харамсалтай нь одоогоор сэргэх боломж төдийлөн харагдахгүй байна хэмээн барууныханд анхааруулсан байна.

Гадаад хэргийн сайд Лавров орон нутгийн цагаар 31-ний өдөр Туркийн Гадаад хэргийн сайдтай хийсэн хамтарсан хэвлэлийн бага хурлын үеэр "Барууныхны манай орны эсрэг хэрэгжүүлж буй эдийн засгийн хориг арга хэмжээ нь Оросоос үр тариа, бордоо экспортлоход саад болж байна. Бидэнд тулгарч буй энэхүү асуудлыг шийдвэрлэх маш нарийн төлөвлөгөөг санал болгосон тохиолдолд уг гэрээг эргэн сэргээхэд бэлэн байна” хэмээн цохон тэмдэглэв.

Өнгөрсөн оны долдугаар сард ОХУ нь НҮБ болон Туркийн зуучлалаар “цэргийн тусгай ажиллагаа”-ны үеэр ч Украин улс Хар тэнгисээр дамжуулан үр тариагаа экспортлох боломжийг бүрдүүлсэн “Хар тэнгисийн үр тарианы хэлэлцээр”-т нэгдсэн боловч Оросын хүнс, бордооны экспортын гэрээний заалтууд хэрэгжихгүй байна гэх шалтгаанаар тус улс өнгөрсөн сард энэхүү гэрээнээс гараад байгаа билээ.

Эх сурвалж: MBC