Германы засгийн газар Украинд 200 сая евро буюу 199 сая ам.долларын тусламжийг дотоод дүрвэгсдийг дэмжих хөтөлбөрт зориулан олгохоор шийдсэн тухай Германы Эдийн засгийн хамтын ажиллагаа, хөгжлийн сайд Свенья Шульце мэдээлэл өглөө.
Тэрбээр "Энэ мөнгө Украинд дотооддоо дүрвэсэн хүмүүст өдөр тутмын энгийн хэрэглээний эд зүйлс, хүнсээр хангахад туслах зорилготой" гэв. Хоёрдугаар сарын сүүлчээс хойш Украинд долоон сая орчим хүн дотооддоо дүрвэсэн байна. Тэрчлэн, Герман улс хүлээн авсан украин дүрвэгсдийн тоогоор Европын холбоонд Польшийн дараа хоёрдугаарт жагсаж байгаа юм. Одоогийн байдлаар 900 мянга гаруй украинчууд Герман руу дүрвэсэн тооцоо байна.
Яг одоо Берлинд айлчилж буй Украины Ерөнхий сайд Денис Шмихал Германы канцлер Олаф Шольц болон Свенья Шульце нартай уулзан цаашдын дэмжлэг туслалцаа болон эрчим хүчний асуудлаар санал солилцож байна. Мөн Украин Германаас илүү олон тооны хүнд зэвсэг авах сонирхолтой байгаа юм.
Эх сурвалж: Deutsche Welle