АНУ болон Энэтхэг улсууд дэвшилтэт технологи, сансар огторгуй, батлан хамгаалах салбарын технологийн солилцоо, хамтын ажиллагааг бэхжүүлэхээр тохиролцжээ. Энэ нь Энэтхэг-Номхон далайн бүс нутагт Хятадыг хазаарлах бодлогын нэг хэсэг хэмээн үзэж болох юм.
Financial Times сонины мэдээлснээр, орон нутгийн цагаар өнгөрсөн сарын 31-ний өдөр АНУ-ын үндэсний аюулгүй байдлын зөвлөх Жейк Салливан, Энэтхэгийн үндэсний аюулгүй байдлын зөвлөх Ажит Добал нар Вашингтон хотноо дээд хэмжээний хэлэлцээ хийсэн болохыг онцолжээ. Энэхүү уулзалтын дараа Салливан хоёр орны хамтын ажиллагааг бэхжүүлэх зорилготой "Дэвшилтэт технологийн үндсэн санаачилга (iCET)"-ийг зарласан байна.
Тэгвэл уг санаачилгын хүрээнд АНУ-ын General Electric (GE) компани нь өөрийн орны засгийн газрын зөвшөөрлөөр Энэтхэгтэй хамтран тийрэлтэт хөдөлгүүр бүтээж, батлан хамгаалах, сансар судлалын салбарт хамтран ажиллахаар болсон аж. Үүнээс гадна АНУ хагас дамжуулагчийн салбарыг өргөжүүлэн хөгжүүлэхийн тулд Энэтхэгийн хагас дамжуулагч үйлдвэрлэгчидтэй хамтын ажиллагаагаа бэхжүүлэхээр шийджээ. Мөн тус хоёр улс 5G утасгүй холбооны сүлжээ, квант тооцоолол, хиймэл оюун ухаан зэрэг салбарт хамтран төсөл хэрэгжүүлэхээр төлөвлөж байна.
АНУ-ын ерөнхийлөгч Жо Байден, Энэтхэгийн ерөнхий сайд Нарендра Моди нар өнгөрсөн оны тавдугаар сард Японд болсон уулзалтын үеэр iCET-ийг эхлүүлэхээ амласан юм. Салливан хэлэхдээ “Энэхүү санаачилга нь хоёр удирдагчийн стратегийн түншлэлийн хувьд хийсэн сонголт төдийгүй хоёр улсын хооронд гүн гүнзгий экосистемийг бий болгоход ихээхэн тус нэмэр болно” хэмээн цохон тэмдэглэв.
Байден 2021 онд албан тушаалдаа орсноосоо хойш Энэтхэг, Номхон далайн бүс нутагт Хятадын нөлөөг хазаарлахын тулд Энэтхэг, Австралитай холбоо тогтоосон билээ. Түүнчлэн Quad буюу АНУ, Австрали, Энэтхэг, Японы аюулгүй байдлын зөвлөх байгууллагын байр суурь, үүрэг зэргийг өргөжүүлэхийн сацуу Австралид цөмийн шумбагч онгоцны технологи нийлүүлсэн юм. Нэрээ нууцалсан АНУ-ын засгийн газрын албан тушаалтан iCET санаачлагын талаар "Энэ жил АНУ болон Энэтхэгийн дипломат харилцааны хувьд хамгийн чухал жилүүдийн нэг байх болно" гэж хэлсэн байна.
Эх сурвалж: Fnnews