Өнгөрсөн сард АНУ-ын санхүүгийн салбарт болсон том дуулианы нэг бол яах аргагүй First Republic банк дампуурсан явдал байв. Тэгвэл тус банкийг худалдаж аваад удаагүй байгаа JP Morgan хөрөнгө оруулалтын банкны зүгээс First Republic банкны 1000 ажилтныг цомхотгохоор болжээ.
Орон нутгийн цагаар 26-ны өдөр Ассошиэйтед Пресс агентлагийн мэдээлснээр, First Republic банкны шинэ эзэн болсон JP Morgan тус банкны 1000 ажилтныг цомхотгохоо саяхан мэдэгдсэн талаар онцлов.
Дампуурлаа зарлахаасаа өмнө тус банк нь 7200 ажилтантай байсан гэж тооцоолоход энэ нь тэдний 15 орчим хувьтай тэнцэж байгаа юм.
JP Morgan банкны зүгээс мэдэгдэхдээ Холбооны Хадгаламжийн Даатгалын Корпорацын (FDIC) журмын дагуу энэ удаагийн худалдан авалтаар тус банкны ихэнх хөрөнгийг бид өөрийн нэр дээр шилжүүлж авч байгаа ч хүний нөөцийг нь ч тэр чигээр нь хадгалж авч явна гэсэн журам байхгүй хэмээн цохон тэмдэглэсэн байна.
Энэ удаад ажлаасаа халагдаж буй ажилтнуудад 60 хоногийн нэмэгдэл цалингаас гадна эрүүл мэндийн даатгал зэрэг хөнгөлөлтийг үзүүлж байгаа гэв. Түүнчлэн ажилласан жилийг нь харгалзан нэмэлт тэтгэмжийг ч олгох аж.
Өнгөрөгч гуравдугаар сард Silicon Valley Bank (SVB) дампуурсны дараахан Сан Франциск хотноо төвтэй First Republic банк дампуурлаа зарласан билээ.
Эх сурвалж: MBC