Энэтхэгийн ерөнхий сайд Нарендра Моди АНУ-д хийж буй айлчлалынхаа хүрээнд Теслагийн гүйцэтгэх захирал Илон Масктай уулзжээ. Энэтхэгийн ерөнхий сайд Нарендра Модигийн хувьд мягмар гарагт АНУ дахь айлчлалаа эхлүүлсэн бөгөөд тэрээр тус улсад нийт 3 хоног саатах юм.
BBC агентлагаас мэдээлснээр Илон Маскийн Нарендра Модитой хийсэн уулзалтын үеэр Энэтхэгийн засгийн газар ноён Маскийг Энэтхэгийн сансрын аяллын салбар хийгээд цахилгаан автомашин үйлдвэрлэлийн салбарт хөрөнгө оруулах боломжийг судалж үзэхэд урьсан гэнэ.
Харин тэдний урилгад Илон Маск хөрөнгө оруулахад оновчтой цагийг л хүлээж байгаа хэмээн хариулж, Теслаг аль чадах хурднаараа Энэтхэгт аваачна гэж амласан байна.
Улмаар уулзалтын дараа сэтгүүлчдэд өгсөн ярилцлагадаа ноён Маск өөрийгөө Нарендра Модигийн шүтэн бишрэгч хэмээн тодорхойлж, Энэтхэг улсыг дэлхийн аль ч улсаас илүү ирээдүйтэй улс хэмээжээ.
Эх сурвалж: BBC