Мягмар гарагийн орой Оросын Батлан хамгаалахын сайд Сергей Шойгу тэргүүтэй Оросын төлөөлөгчид Хойд Солонгос улсад газарджээ. Тэдний араас лхагва гарагт Хятадын төлөөлөгчид Хойд Солонгос улсад газардсан байна.

Орос, Хятадын зүгээс тийн төлөөллөө илгээх болсон шалтгаан нь энэ сарын 27-ы өдөр хоёр Солонгосын хоорондох дайн дууссаны 70 жилийн ой тохиож байгаа юм. Хойд Солонгос улсын хувьд уг тэмдэглэлт өдрийг тохиолдуулан цэргийн томоохон жагсаалыг зохион байгуулдаг уламжлалтай.

Энэ удаагийн айлчлалын гол онцлог нь БНАСАУ коронавирусийн цар тахал дэгдэж, хилээ хааснаас хойш гаднаас элч төлөөлөгч хүлээн авч буй анхны айлчлал болж байгаа юм. Улмаар олон улсын хэвлэл мэдээллийн сувгуудын таамаглаж байгаагаар дайн дууссан тэмдэглэлт өдөр Хойд Солонгос улс дотоод дахь коронавирусээс урьдчилан сэргийлэх журмаа хөнгөрүүлж магадгүй гэнэ. Учир нь Хойд Солонгосын төрийн хэвлэл мэдээллийн албанаас хэдэн долоо хоногийн өмнө нийтэлсэн зургуудаас үзэхэд хойд солонгосчууд амны хаалт хэрэглэхээ больсон байжээ.

Эх сурвалж: BBC