Лхагва АНУ-ын ерөнхийлөгч Жо Байден Израиль улсад хийсэн айлчлалынхаа хүрээнд Газын зурвас руу хүмүүнлэгийн тусламж нэвтрүүлэх тохиролцоонд хүрч, баасан гарагаас хүмүүнлэгийн тусламжийг тээвэрлэсэн ачааны чингэлгүүдийг Египетийн хилээр дамжуулан Газын зурваст хүргэнэ гэжээ.
Ерөнхийлөгч Байдены зүгээс энэ тухай мэдэгдэхийн сацуу Газын зурвас дахь эмнэлгийн бөмбөгдөлтөд хэн буруутай гэж бодож байгаа талаараа хуваалцсан байна. Улмаар ноён Байдены хэлснээр олон зуун гэмгүй иргэний аминд хүрсэн бөмбөгдөлтийн ард Израиль улс байгаагүй гэсэн юм.
Тодруулбал, ерөнхийлөгч Жо Байден Израилийн ерөнхий сайд Бенжамин Нетаньяхутай уулзаж байхдаа, “Би өөрийн харсан үзсэнээс дүгнэвэл, бөмбөгдөлтийг та нар бус өөр бүлэглэл зохион байгуулсан нь харагдаж байна” гэжээ.
Мягмар гарагийн орой Газрын зурвас дахь нэгэн эмнэлгийг хэн нь тодорхойгүй этгээдүүд бөмбөгдөж, 500 орчим жирийн иргэн амиа алдсан ч одоог болтол хэргийн буруутан олдохгүй байгаа юм. Хэргийн хүрээнд Хамас, Хесболла бүлэглэлийн зүгээс Израиль улсын бөмбөгдөлтөд буруутгаж байгаа бол Израиль улсын талаас Жихад бүлэглэлийг буруутгаж байгаа билээ.
Эх сурвалж: USA Today