Photoshop программыг хөгжүүлэгч Adobe компанийн үүсгэн байгуулагчдын нэг Жон Варнок бямба гарагт 82 насандаа таалал төгсжээ. Энэ талаар Adobe компани ням гарагт мэдэгдэл гаргасан байна.
Одоогоор түүний үхлийн шалтгааныг олон нийтэд ил болгоогүй байгаа юм.
Ройтерс агентлагаас мэдээлснээр Adobe компанийн гүйцэтгэх захирал Шантану Нараен ажилтнууддаа илгээсэн цахим шууданд, “Өнөөдөр Adobe-ийн боловсон хүчин хийгээд түүний олон арван жилийн турш урам зориг өгч ирсэн салбарын хувьд гунигтай өдөр болж байна” хэмээн өгүүлсэн байна.
Ноён Варнокийн хувьд 1982 онд Чарльз Гешкегийн хамтаар Adobe компанийг үүсгэн байгуулж байсан бөгөөд 2000 онд гүйцэтгэх захирлын суудлаа өгч, 2017 оныг хүртэл ТУЗ-ийн даргын албыг Чарльз Гешкетэй хамтран хашиж байсан юм.
Эх сурвалж: The Reuters