Нэг хэсэг тун эрчимжиж байсан АНУ-ын хөдөлмөрийн зах зээл аажмаар хөрж байгаа талаарх ажил эрхлэлтийн судалгаа гарчээ.
АНУ-ын Хөдөлмөрийн яамнаас гаргасан өнгөрөгч 8-р сарын хөдөлмөр эрхлэлтийн тайланд дурдсанаар, тус улсын ажилгүйдлийн түвшин өнгөрсөн сард 3.8 хувьд хүрсэн нь өмнөх сараас 0.3 пунктээр өссөний зэрэгцээ сүүлийн 1 жил 6 сарын хугацаан дахь хамгийн өндөр үзүүлэлт болжээ.
Өнгөрөгч 8-р сард АНУ-ын хөдөө аж ахуйн бус салбарын ажлын байр өмнөх сараас 187,000-аар нэмэгдсэн нь сүүлийн 12 сарын дундаж өсөлт болох 271,000-аас хамаагүй доогуур байсан юм.
АНУ-ын хөдөлмөрийн зах зээлийн хэт эрчимжил хурдацтай буурч байгаа тул Холбооны нөөцийн сан бодлогын хүүгээ цаашид нэмэгдүүлэхээ зогсоох магадлал өндөр байна гэж шинжээчид таамаглаж байна.
Тодруулбал Уолл Стритийн нэрт эдийн засагч, Аллианз группын зөвлөх Мохаммед Эль-Эриан олон нийтийн мэдээллийн хэрэгслээр "Эдийн засгийн үзүүлэлтүүдээс ихээхэн хамаардаг Холбооны нөөцийн сан нь яг энэ эгзэгтэй үед бодлогын хүүгээ цаашид өсгөхгүй байх магадлалыг хөдөлмөр эрхлэлтийн энэхүү тайлан нэмэгдүүлж байна” хэмээн цохон тэмдэглэв.
Эх сурвалж: MBC