Японы засгийн газар 17-ны өдөр Израилийн бүслэлтэд өртөж агаарын дайралтын бай болж буй Палестины Газын зурвас дахь ард иргэдэд олон улсын байгууллагуудаар дамжуулан 10 сая ам.долларын хүмүүнлэгийн тусламж үзүүлэхээр шийдвэрлэсэн болохоо мэдэгдэв.
Японы Гадаад хэргийн сайд Йоко Камикава мөн өдөр хийсэн хэвлэлийн бага хурлын үеэр “Хамас зэрэг Палестины зэвсэгт хүчний террорист халдлагыг бид хатуу зэмлэн буруушаахын зэрэгцээ гэм зэмгүй иргэд болон Палестины ард иргэдийг хоол хүнс, ундны ус болон эмнэлгийн хэрэгслээр хангах дипломат хүчин чармайлтаа үргэлжлүүлсээр байх болно” хэмээн цохон тэмдэглэсэн байна.
Тэрээр цааш нь хэлэхдээ, "Бид тус бүс нутаг дахь нөхцөл байдлыг нухацтай ажиглаж байгаа ба Газын зурвас дахь дайныг хурдан намжааж, хүмүүнлэгийн байдлыг сайжруулахын тулд олон улсын байгууллагуудтай хамтран ажиллах болно" гэжээ.
Газын зурвасыг гадаад ертөнцтэй холбох гарцыг нээх асуудал тун удаашралтай байгаагийн улмаас тусламжийн бараа бүтээгдэхүүн хүрэх газартаа хүрч чадахгүй байгаа нь хүмүүнлэгийн хямралд хүргэх вий гэх түгшүүр олон улсын түвшинд нэмэгдсээр байгаа юм.
Эх сурвалж: MBC