Ням гарагт “Их 7” бүлгийн гишүүн орнууд Япон улсаас импортлох хоол хүнсэнд тавьсан хоригийг нэн даруй цуцлахыг уриалжээ. Ройтерс агентлагаас мэдээлснээр тэдний энэ уриалга БНХАУ-ыг чиглэсэн гэсэн юм.

Учир нь Хятад улсын хувьд Япон улс Фукушимагийн атомын цахилгаан станцын цацраг идэвхт усыг цэвэршүүлснээ далайд цутгахад Япон улсаас импортлох далайн бүтээгдэхүүнд хориг тавьсан билээ. Гэсэн ч “Их 7” бүлгийн зүгээс уриалгадаа Хятад улсыг огтоос дурдаагүй юм.

Тэдний ийн уриалах болсон шалтгаан нь “Их 7” бүлгийн үзсэнээр Япон улсын экспортын нэг томоохон хэсэг болсон далайн бүтээгдэхүүнд хориг тавих нь тус улсын худалдаанд ихээр дарамт үүсгэж байна гэжээ.

Гэвч Япон улсын далайн бүтээгдэхүүнд хориг тавьсан цор ганц улс нь Хятад биш билээ. Тодруулбал, ОХУ-ын зүгээс энэ сарын эхэнд ижил хоригийг тавьж буйгаа мэдэгдэж байсан юм.

Тийнхүү “Их 7” бүлгийн уриалгыг дуулсан Хятад улсын зүгээс тэдний эл алхмыг “эдийн засгийн шахалт” хэмээн тодорхойлж, “Их 7” бүлэгт давхар стандарт хэрэгжүүлэхээ больж, олон улсын худалдаа, хөрөнгө оруулалтын хэвийн дэг журмыг хадгалах бодит арга хэмжээг авч хэрэгжүүлэхийг уриалжээ.

Эх сурвалж: The Reuters