Өнгөрөгч 10-р сард АНУ-д ажил эрхлэлтийн түвшин өмнөх сартай харьцуулахад тун бага тоогоор өсжээ.

Хөдөлмөр эрхлэлтийн мэдээллийн Automatic Data Processing судалгааны хүрээлэнгийн орон нутгийн цагаар 1-ний өдөр мэдээлснээр, АНУ-д хувийн хэвшлийн аж ахуй нэгж, компаниуд дахь ажил эрхлэлтийн тоо өнгөрөгч 10-р сард өмнөх сарынхаас 113 мянгаар нэмэгдсэн болохыг онцлов.

Энэ нь өмнөх сартай (89,000) харьцуулахад өссөн үзүүлэлт хэдий ч Wall Street Journal сонины шинжээчдийн таамаглал буюу 130 мянгаас бага байлаа.

Үйлчилгээний салбар 107 мянгаар өссөн нь 10-р сарын өсөлтийн дийлэнх хувийг эзэлж байгаа бол нарийн мэргэжлийн салбар дотроос боловсрол, эрүүл мэндийн үйлчилгээ хамгийн их буюу 45 мянгаар өссөн байна.

Өнөөг хүртэл хөдөлмөр эрхлэлтийн өсөлтийг тэргүүлж байсан зочлох үйлчилгээний салбар өсөлтөө сааруулж, 17 мянгаар нэмэгджээ.

Харин цалин өмнөх онтой харьцуулахад 5.7 хувиар өссөн нь 2021 оны аравдугаар сараас хойших хамгийн бага өсөлт болсон байна.

Automatic Data Processing хүрээлэнгийн ахлах эдийн засагч Нелла Ричардсон хэлэхдээ "Цар тахал дэгдсэнээс хойш өнөөдрийг хүртэл бүхий л салбарт цалинг маш эрчимтэйгээр өсгөх хандлага ажиглагдаж байсан бол энэ үе үүгээр дуусч буй бололтой. Гэхдээ хөдөлмөрийн зах зээлийн идэвхжил нэг үеэ бодоход харьцангуй удааширсан ч хэрэглээг дэмжихэд хангалттай хэвээр байна” хэмээн онцлон тэмдэглэв.

Эх сурвалж: JoongAng