Европын холбоо энэ оны эцэс гэхэд хамгийн багадаа 1.3 сая ширхэг сум үйлдвэрлэх хүчин чадалтай болно гэдгээ мэдэгдэв.
Европын холбооны Euraktive хэвлэл мэдээллийн агентлагийн орон нутгийн цагаар 20-ны өдөр мэдээлснээр, Европын холбооны комиссар Тьерри Бретон өмнөх өдөр нь Эстонийн Таллин хотод айлчлах үеэрээ “Бид сум үйлдвэрлэх хүчин чадлаа үргэлжлүүлэн бэхжүүлж, оны эцэс гэхэд 1.3 саяас 1.4 сая орчим үйлдвэрлэх боломжтой болно” хэмээн цохон тэмдэглэжээ.
Тэрээр үргэлжлүүлэн "Үйлдвэрлэлийн хүчин чадал ирэх жил ч мөн мэдэгдэхүйц нэмэгдэх болно" гэж нэмж тайлбарласан байна.
Түүнчлэн ноён Бретон "Ийнхүү өсөн нэмэгдэж буй сум үйлдвэрлэлийн ихэнх хэсгийг юуны түрүүнд Украинд нийлүүлэх зайлшгүй шаардлагатай” хэмээн дурджээ.
Гэвч одоогийн байдлаар Европын холбооны хэмжээнд хэчнээн сум үйлдвэрлэж байгаа нь нууцад хамаарах мэдээлэл хэмээн олон нийтэд ил зарлахаас татгалзсан юм.
Энэ нь Украиныг удаан хугацаагаар дэмжсэний улмаас Европын орнуудын зэвсгийн нөөц шавхагдаж, Украинд үзүүлэх дэмжлэг тэр хэрээр багасна гэсэн болгоомжлолын хариуд хийсэн мэдэгдэл хэмээн шинжээчид харсан байна.
Тус холбоо өнгөрсөн оны гуравдугаар сард дараагийн нэг жил орчмын хугацаанд Украинд нэг сая ширхэг сум нийлүүлнэ гэж амлаж байсан билээ. Тэгвэл тухайн үеэс хойш 10 сар орчим өнгөрчихөөд байхад ердөө 300 мянга орчим сум нийлүүлсэн гэх тооцоо бий.
Комиссар Бретон "Бид Украиныг бүх боломжит нөхцөлөөр үргэлжлүүлэн дэмжих ёстой ба Европын холбоо цаашид ч дэмжнэ гэдгээ амлаж байна” хэмээн үргэлжлүүлжээ.
Бретонтой уулзсан Эстонийн ерөнхий сайд Кая Калас Умард Солонгосын тал ОХУ-д 1 сая гаруй их бууны сум нийлүүлсэн гэх Өмнөд Солонгосын Үндэсний тагнуулын албаны мэдэгдлийг дурдаж “Хэрэв Умард Солонгос хийж чадсан бол Европ ч хийж чадах нь гарцаагүй” хэмээв.
Ерөнхий сайд Калас "ОХУ НАТО-гийн аюулгүй байдалд шууд заналхийлж байна" гэж мэдэгдээд НАТО-гийн бүх гишүүн орнуудыг заналхийллийн эсрэг хариу арга хэмжээ авахыг энэ үеэр уриалсан юм.
Эх сурвалж: Yonhap