Баасан гарагт Филиппин улсад дэлхийн алдарт Coldplay хамтлаг тоглолтоо хийжээ. Улмаар тус тоглолтыг Филиппин улсын ерөнхийлөгч Фердинанд Маркос Жуниор өөрийн эхнэрийн хамтаар очиж үзсэн байна. Тийн очихдоо ерөнхийлөгч Маркос нисдэг тэргээр зорчсон юм.

Үүнийг мэдсэн шүүмжлэгчдийн зүгээс ерөнхийлөгчийг засгийн газрын нөөцийг буруугаар ашигласан хэмээн буруушаасан байна. Гэвч ноён ерөнхийлөгч өөрийгөө өмгөөлж, зам тээврийн урьдчилан тооцоолоогүй асуудал гарсан тул нисдэг тэргээр зорчсон хэмээжээ. Түүнчлэн ерөнхийлөгчийн Аюулгүйн албаны дарга Нелсон Моралес ч мэдэгдэл хийсэн бөгөөд түүний хэлснээр, “40,000 орчим хүн тоглолтыг үзэх болсноор зам тээвэр хэт ачаалсан” гэсэн байна. Тийнхүү ноён Моралес олон нийтээс эл үйлдлийг ойлгохыг хүсэж, улсынхаа ерөнхийлөгчийн аюулгүй байдал, эрүүлийг хамгаалсан шийдвэрийг дэмжихийг хүсжээ.

Гэвч олон нийтийн зүгээс тэдний эл мэдэгдэлд эгдүүцэн цахим хуудаснаа өөрсдийн бухимдлыг илэрхийлсэн байна.

Эх сурвалж: BBC