ОХУ-ын төрийн тэргүүн Владимир Путин ирэх онд болох ерөнхийлөгчийн сонгуульд бие даан нэр дэвшиж өрсөлдөнө гэж Төрийн Дум дахь "Шударга Орос-Үнэний төлөө" намын бүлгийн дарга Сергей Миронов мэдэгдлээ.
Түүний хэлснээр, төрийн тэргүүн ирэх сонгуульд бие даан нэр дэвшигчийн хувиар өрсөлдөнө гэдгийг зохион байгуулах хорооны хурлаар зарлах аж. "Шударга Орос" болон “Ардын фронт” намынхан Путинийг нэр дэвшүүлэх гарын үсгийг цуглуулна гэж Миронов нэмж хэлжээ.
ОХУ-ын Коммунист намаас Төрийн Думд сонгогдсон Николай Харитонов, "Шинэ ард түмэн" намын дарга Алексей Нечаев нар ирэх онд болох ерөнхийлөгчийн сонгуульд В.Путинтэй өрсөлдөж магадгүй гэж "Ведомости" сонины эх сурвалжууд өмнө нь мэдээлж байсан юм.
Ирэх оны гуравдугаар сард болох сонгууль Оросын түүхэнд анх удаа гурван өдрийн турш буюу 2024 оны гуравдугаар сарын 15-наас 17-ны хооронд болно.
Эх сурвалж: РИА Новости /МОНЦАМЭ агентлаг/