Хагас дамжуулагч үйлдвэрлэлээрээ дэлхийд тэргүүлэгч Тайванийн TSMC компани Японд хоёр дахь үйлдвэрээ барих төлөвлөгөөгөө албан ёсоор танилцууллаа.
Ройтерс агентлагийн мэдээлснээр, TSMC компани нь Японд хоёр дахь үйлдвэрийнхээ бүтээн байгуулалтыг эхлүүлэн 2027 оны эцэс гэхэд дуусгавар болгохоор төлөвлөж буй талаар онцолсон бөгөөд Японы засгийн газрын дэмжлэгтэйгээр тус улсад хийж буй нийт хөрөнгө оруулалтын хэмжээ 20 тэрбум ам.доллароор хэмжигдэж байгаа талаар зарласан байна.
Хэрэглэгчийн эрэлт хэрэгцээ нэмэгдэж байгаатай холбогдуулан тус компани Японы Кумамото хотод хоёр дахь үйлдвэрээ барихаар төлөвлөж байгаа бөгөөд энэ оны эцэс гэхэд барилгын ажлыг эхлүүлэх аж.
TSMC компани нь энэ сарын 24-ний өдөр 7 тэрбум ам.долларын өртөг бүхий Кумамото дахь анхны үйлдвэрийнхээ барилгын ажлыг дуусгавар болгох бөгөөд энэ оны сүүлээр үйлдвэрлэлээ эхлүүлэхээр төлөвлөж байгаа юм.
Эх сурвалж: MBC