96 дахь удаагийн Оскарын наадам энэ оны гуравдугаар сарын 10-ы өдөр зохион байгуулагдах болсон билээ. Тэгвэл даваа гарагт эх сурвалжуудын мэдээлснээр эл наадмын үеэр жүжигчин Райан Гослинг “Barbie” кинон дээр дуулсан “I’m just Ken” дуугаараа үзүүлбэр үзүүлнэ гэжээ.

Гэсэн хэдий ч наадмыг зохион байгуулагчдын зүгээс энэхүү мэдэгдлийн хүрээнд ямар нэг албан тайлбар хийхээс татгалзсан байна.

Жүжигчин Райан Гослингийн хувьд хоёрдугаар сард Variety сэтгүүлд өгсөн ярилцлагадаа дурдсанаар, “Академийн шагнал гардуулах ёслолын зохион байгуулагчдын зүгээс намайг наадмын үеэр үзүүлбэр үзүүлээч хэмээн хараахан албан ёсоор асуугаагүй байгаа. Миний хувьд Оскарын наадмын үеэр үзүүлбэр үзүүлнэ гэдэг хэтийдсэн их эрсдэл байж магадгүй. Би л лав үүнийг хэрхэн бодит байдалд биелүүлэхээ мэдэхгүй байна. Гэхдээ хэрэв санал тавивал би дуртайяа хүлээн авна” гэсэн юм.

Харин уг дууг зохиосон уран бүтээлч Марк Ронсоны хэлснээр түүний хувьд Райан Гослинг эл дууг дуулан Оскарын тайзнаа үзүүлбэр үзүүлэх нь мөрөөдөл хэмээжээ.

Эх сурвалж: The Variety