Улаан тэнгист живсэн хөлөг онгоц экологид аюул учруулж болзошгүйг сэрэмжлүүлэв
3 сарын 4. 10:530

Өнгөрсөн сард Йемений хутичуудын дайралтад өртсөн ачаа тээврийн “Rubymar” хөлөг онгоц бямба гарагт Улаан тэнгисийн өмнөд хэсэгт живсэн тухай Йемений засгийн газар мэдэгдлээ.

Их Британийн уг хөлөг онгоцоор бордоо тээвэрлэж байсан тул “экологид аюул” учирч болзошгүй гэдгийг дээрх мэдээлэлд сэрэмжлүүлсэн байна. Түүнчлэн Нэгдсэн Вант улсын далайн замын худалдааны газраас хөлөг онгоц живсэн тухай мэдээлсэн боловч түүний нэрийг дурдаагүй ажээ.

Энэ мэдээлэл батлагдах аваас өнгөрсөн оны 11 дүгээр сараас хойш үргэлжилж буй хутичуудын дайралтад өртөж живсэн анхны хөлөг онгоц нь Rubymar болж байна. Йемений босогчдын “Ансар-Аллах” бүлэглэл олон улсын ачаа тээврийн хөлөг онгоцнууд руу дайрсаар байгаа учраас тэдгээр хөлөг онгоцнууд Африк тивийн урдуур тойрч явахаас аргагүйд хүрч байгаа юм. Хутичууд энэхүү үйлдлээ “Израилын цэргийн ажиллагааг эсэргүүцэж, палестинчуудтай эв нэгдэлтэй байгаагаа илэрхийлж байна” хэмээн тайлбарладаг.

Америкийн цэргийнхний мэдэгдсэнээр, 41 мянган тонн бордоо тээвэрлэж байсан Rubymar хөлөг онгоцны түлш асгарсны улмаас 29 км урт нефтийн толбо үүссэн байна.

Их хэмжээний бордоо далайн усанд асгарсан нь далайн тэнгисийн амьтан, ургамлын төрөл зүйлүүдэд ноцтой аюул учруулна гэдгийг Иорданы их сургуулийн Далай судлалын станцын захирал Али Аль-Савальмих хэлж байна. Учир нь, тэжээлийн бодисын илүүдэл нь замгийн ургалтыг хэт идэвхжүүлэх тул далай тэнгисийн бусад ургамал амьтан хүчилтөрөгчийн дутагдалд орно. Ийм үзэгдлийг эвтрофикац гэж нэрлэдэг ажээ. Улаан тэнгисийн өмнөд хэсгийн эко систем нь шүрэн хаднууд, мангро модны төгөлүүд ба олон төрөл зүйлийн далайн амьтдыг хамардаг.

Хөлөг онгоц живсэн газарт асгарсан бордоо далайн давалгаанд туугдаж тархах уу, ямар байдлаар далайд асгарах вэ гэдгээс Улаан тэнгисийн экологийн тогтолцоонд учрах хохирлын хэмжээ хамаарна.

Йемений Гадаад хэргийн сайд Ахмед Авад бин Мубарак Х нийгмийн сүлжээнд бичихдээ “Rubymar хөлөг онгоц живсэн нь Йеменд төдийгүй бүс нутагт хэзээ ч тулгарч байгаагүй экологийн сүйрэл боллоо” гэжээ.

Өнгөрсөн онд Йемений эрэгт байсан супертанкераас 1 сая баррель нефть асгарсныг НҮБ-ын оролцоотойгоор цэвэрлэснээр экологийн сүйрэл болохоос зайлсхийж чадсан юм. Харин одоогийн нөхцөлд ийм ажиллагаа явуулах нь илүү төвөгтэй болж байна.


Эх сурвалж: VOA /МОНЦАМЭ агентлаг/

Энэ мэдээнд өгөх таны сэтгэгдэл?
0
0
0
0
0
1
0
Сэтгэгдэл үлдээх
Нийт 0 сэтгэгдэл
Онцлох мэдээ
Зөвхөн баячуудын сонирхдог байсан хоргодох байрыг Германы дундаж давхаргынхан олноор захиалах болжээ
02024-7-15 4:15
Дональд Трамп руу зэвсэгт этгээд гал нээх үед юу болж өнгөрөв?
02024-7-14 19:10
БНХАУ: Төрөлт буурч, насжилт ихсэж байгаагаас цэцэрлэгүүдийг ахмадуудад зориулсан төв болгож эхэлжээ
02024-7-14 16:08
НҮБ: 60 жилийн дараа дэлхийн хүн ам 10.29 тэрбумд хүрнэ
02024-7-13 3:54
Дэлхийн нар, салхины эрчим хүчний нийт төслийн 64 хувь нь Хятадад хэрэгжиж байна
02024-7-13 3:45
Эдийн засгаараа Африкийн орнуудыг тэргүүлж асан Нигери улс гуравдугаар байр руу ухарчээ
12024-7-12 2:57
Хятадын зах зээлд тэсэж үлдэнэ гэдэг гадны автомашин үйлдвэрлэгчдийн хувьд томоохон сорил
12024-7-11 3:25
Honda компани Тайланд дахь нэг үйлдвэрийнхээ үйл ажиллагааг зогсоохоор болжээ
02024-7-10 14:36
Хиймэл оюун хувьсгал хийж, орлогын пирамидын оргилоос санхүүгийн салбарыг буулгав
02024-7-9 12:58
Копенхаген хотод хог түүсэн жуулчдад шагналтай
02024-7-9 12:26