Үндэсний мэдлэг түгээх суваг ЗАНГИА АКАДЕМИ нь хөдөлмөрийн зах зээлийг төгөлдөржүүлэх, хөдөлмөрчдөд ажлын байрны ур чадварыг төлөвшүүлэх, сургах, хөгжүүлэх чиглэлд хөрөнгө оруулах үүднээс 200 гаруй мэргэжлийн ур чадвар болоод хувь хүний хөгжлийн сургалтыг боловсруулан үнэ төлбөргүйгээр олон нийтэд хүргэж байгаа билээ.

ЗАНГИА.МН-ийн дэд захирал Г.Төртогтох үндэсний хэмжээнд цахим технологиор дамжуулан боловсрол олгох, мэдлэг, ур чадвартай боловсон хүчин бий болгох, тэдний эрх ашгийг хамгаалах чиглэлд хэрэгжүүлж болох хамтын ажиллагааны талаар МҮЭХ-ны Ерөнхий удирдлагын газрын дарга С.Золбаяр, Сургалт судалгааны газрын дарга Н.Мөнхтуул нартай уулзаж санал солилцлоо.
МҮЭ-ийн холбоо нь хөдөлмөр эрхэлж буй 200 гаруй мянган гишүүн, мэргэжил үйлдвэрлэлийн 14 холбоо аймаг, нийслэлийн 22 холбоотой бөгөөд хөдөлмөр нийгмийн түншлэлийг хөгжүүлэх, хөдөлмөр, нийгмийн хамгаалалтай холбогдсон хууль тогтоомжуудыг эдийн засаг, нийгмийн шинэ харилцаанд нийцүүлэн боловсронгуй болгоход оролцох, нийгмийн түншүүдтэй хамтран зорилтот хөтөлбөрүүдийг боловсруулж хэрэгжүүлэх чиг үүрэгтэй.

Энэ хүрээндээ ЗАНГИА АКАДЕМИТАЙ сургалт хөгжлийн хөтөлбөрүүдийг хамтран хэрэгжүүлэх замаар МҮЭ-ийн нийт гишүүдийг Зангиа Академийн сургалтуудад хамруулах, ур чадвар олгох, хөгжүүлэх үр дүнтэй хамтын ажиллагааг эхлүүлэхээр талууд санал нэгдлээ.