БНАСАУ-ын дарга Ким Жон Ун ОХУ-ын Еөнхийлөгч Владимир Путинд бэлэг болгон пунсан үүлдрийн хоёр нохой өгсөн талаар Солонгосын төв мэдээллийн агентлаг өнөөдөр мэдээллээ.

Хоёр орны удирдагч өчигдөр/06.19/ уулзаж, иж бүрэн стратегийн түншлэлийн хэлэлцээр байгуулж, дараа нь Кумсусан зочны өргөөний цэцэрлэгт хүрээлэнд алхангаа аминчхан яриа өрнүүлцгээсэн билээ.

Тэгэхдээ Путин бэлэг болгон Оросын тансаг зэрэглэлиийн Аурус лимузин машин өгснийг хамтдаа унаж, тойрж үзсэн аж. Энэ талаар хэвлэл “Нөхөр Ким Жон Ун нөхөр Ерөнхийлөгчийн бэлэглэсэн автомашинд дахин дахин баярлан талархсанаа илэрхийлэв” гэжээ.

Ким Жон Унд Аурус машин бэлэглэх нь гэвч НҮБ-ын хориг арга хэмжээг зөрчсөн үйлдэл гэдгийг тэд тоосонгүй.

Харин Ким Жон Ун хариуд нь Путинд Умард Солонгосын уламжлалт гэгдэх пунсан үүлдрийн нохой бэлэглэж, Путин ч талархал илэрхийлсэн гэнэ.

Өмнө нь Ким Жон Ун 2018 оны есдүгээр сард Пёнянд Өмнөд Солонгосын Ерөнхийлөгч асан Мүн Жэ Интэй уулзахдаа мөн Гоми, Сунган нэртэй хоёр нохойгоо бэлэглэж байсан юм.

Эх сурвалж: Yonhap