АНУ-ын агаарын тээврийн Дельта Эйр Лайнсийн зүгээс ажилчдаа вакцинд хамрагдахыг шаардах шахалтаа улам эрчимжүүлж эхэлжээ. Хэдийгээр тэд вакциныг заавал хийлгэсэн байхыг шаардахгүй ч вакцин хийлгээгүй ажилчдадаа авах арга хэмжээний төлөвлөгөөг танилцуулсан байна.
Энэ долоо хоногийн лхагва гарагт тус компаниас ажилчдадаа хүргүүлсэн захидалд вакцин хийлгүүлээгүй ажилчид дотор орчинд заавал амны хаалт зүүх гэнэ. Тус шаардлага нь ирэх сарын 12-ны өдрөөс эхлэн хэрэгжих бөгөөд вакцинд хамрагдаагүй ажилчид долоо хоног бүр коронавирусийн шинжилгээ өгөх ажээ.
Мөн Дельта Эйр Лайнс авиа компанийн зүгээс коронавирусийн халдвар аван эерэг гарсан ажилчдадаа цалинтай чөлөө олгож, эмнэлгийн зардлыг нь өгдөг бол ирэх сарын 30-ны өдрөөс эхлэн вакцинд хамрагдаагүй, коронавирусээр халдварласан ажилчдад тус мөнгөн тусламжийг өгөхгүй байхаар шийдвэрлэжээ.
Түүнчлэн 11 дүгээр сарын 1-нээс эхлэн тэдний цалингаас 200 долларын шимтгэл тооцож явах юм. Учир нь коронавирусээр халдварласан нэг ажилтны зардал 50 мянган ам.долларын зардалтай байдаг гэнэ.
Эх сурвалж: NY Times