Ассошиэйтед Пресс зэрэг гадаадын хэвлэл мэдээллийн хэрэгслүүдийн орон нутгийн цагаар 21-ний өдөр мэдээлснээр Honda Motors компани түлшний насосны доголдлын улмаас АНУ-аас 2.5 сая гаруй автомашинаа эргүүлэн татахаар төлөвлөж байгаа талаар онцолсон байна.
АНУ-ын Үндэсний авто замын хөдөлгөөний аюулгүй байдлын албаны мэдээлснээр 2017-2020 оны Acura зэрэг Honda Motors компанийн автомашинуудад суурилуулсан түлшний насостой холбоотой зарим эд ангиудад асуудал үүссэн хэмээн дурджээ. Хэрвээ уг асуудлыг шийдвэрлэхгүй орхисон тохиолдолд цаг хугацаа өнгөрөх тусам түлшний насосны эх биед гажилт үүсэж улмаар түлшний насос ажиллагаагүй болох эрсдэл үүснэ хэмээн Үндэсний авто замын хөдөлгөөний аюулгүй байдлын алба тайлбарлав.
Түүнчлэн түлшний насос ажиллагаагүй болсон тохиолдолд машины хөдөлгүүр асахгүй эсвэл жолоо барьж байх үед хөдөлгүүр зогсч болзошгүй тул осол аваар гарах эрсдэл нэмэгдэнэ хэмээн тус байгууллагын зүгээс анхааруулсан байна.
Харин Honda Motors компани уг асуудалтай холбоотой осол гарч, хүн бэртэж гэмтсэн тухай мэдээлэл өнөөг хүртэл ирээгүйчхэмээн цохон тэмдэглэв.
Тус компани энэхүү шийдвэрийнхээ хүрээнд эргүүлэн татаж буй бүх автомашины түлшний насосыг үнэ төлбөргүй сольж өгөх ба эргүүлэн татахтай холбоотой бусад бичиг баримтыг ирэх оны хоёрдугаар сараас эхлэн илгээнэ гэж нэмж дурдсан байна.
Honda Motors компани үргэлжлүүлэн "Уг шийдвэрийн хүрээнд эргүүлэн татаж буй бүхий л тээврийн хэрэгсэлд шаардагдах сэлбэг хангалтгүй байгаа бөгөөд бид автомашин эзэмшигчиддээ энэ тухай үе шаттайгаар мэдэгдэхээр төлөвлөж байна” хэмээн өгүүлжээ.
Эх сурвалж: Newsis