Их Британи улсад бүтэн долоо хоногийн турш үргэлжилж буй логистикийн асуудлаас үүдэлтэй шатахууны хямрал Премьер лигт тоглохоор болсон дэлхийн алдарт хөлбөмбөгчин Криштиану Роналдуг ч тойрч гарсангүй.

Британийн Daily Mail зэрэг орон нутгийн хэвлэл мэдээллийн хэрэгслүүд орон нутгийн цагаар 1-ний өдөр мэдээлснээр Роналдогийн жолооч 220,000 фунт стерлингийн үнэтэй түүний Bentley машинд шатахуун авахаар станцын гадаа 7 цаг дугаарлан хүлээсэн боловч эцэст нь дусал шатахуун ч авч чадаагүй байна гэжээ.

Мөн иргэдийн гэрчилж буйгаар өнгөрсөн сарын 29-ний өдөр 14.20 цагийн үед түүний жолоочийн хамтаар хамгаалалтын албаныхан нь Range Rover маркийн автомашин хөлөглөн Роналдогийн гэрийн ойролцоох шатахуун түгээх станц руу явсан боловч бүтэлгүйтэж оройн 21 цаг өнгөрсөн хойно эргэж ирсэн гэсэн мэдээлэл гарсан юм.

Их Британи улс нь Brexit-ийн дараа шатахуун тээвэрлэх том оврын ачааны машины жолооч олж чадахгүй байгаагаас ийнхүү шатахууны хямралд өртөөд байгаа билээ. Тус улсын Ерөнхий сайд Борис Жонсон хэлэхдээ нөхцөл байдал сайжирч байгаа гэсэн боловч шатахуун авахаар дугаарлаж буй машинууд урт дараалал үүсгэсэн хэвээр байгаа юм. Тус салбарын албаны хүмүүсийн үзэж байгаагаар энэ байдал нэг сар хэртэй үргэлжилнэ гэж таамаглажээ. Үүнээс үүдэн шатахуун тээвэрлэдэг том оврын автомашины жолоочийг зэвсэг барин айлган сүрдүүлсэн, ШТС-ын эзэнд хүч хэрэглэсэн тохиолдол хүртэл гарчээ.

Түүнчлэн шатахуун түгээх станцуудаас гадна супермаркет, түргэн хоолны газруудын логистик хүргэлтийн асуудал бүх талаар тасалдаад буй юм. Сургуулийн автобус хэвийн ажиллахгүй байгаагаас үүдэн сургуулийн үйл ажиллагаа тасалдахад хүрч, эмч, сувилагч нарын автомашины шатахуун дууссанаас ажилдаа явж чадахгүйд хүрээд байна.

Сонирхуулахад Роналду нь зөвхөн Bentley төдийгүй 3 Ferrari, 2 Lamborghini, 2 Bugatti, 2 McLaren, 2 Rolls-Royce, Porsche 911 Turbo S, Koenigsegg CCX, Range Rover Sport SVR, Audi гэх мэт машинуудыг эзэмшдэг ажээ.

Эх сурвалж: Korean Economy