Хоол хүргэлтийн DoorDash компани WeDash хөтөлбөрөө сэргээн нэвтрүүлснээс улбаалан дор хаяж нэг сарын хугацаанд инженер, гүйцэтгэх захирал, албаны дарга гээд бүх л ажилтнаа хүргэлтэд дайчлах болжээ. Харин зарим нэг ажилтан нь дээрх шийдвэрийг эсэргүүцэж байгаагаа цахим хуудаснаа илэрхийлээд амжсан байна.
2013 онд л үйл ажиллагаанд нэвтрээд байсан тус хөтөлбөр нь олон нийтийн болон хүмүүнлэгийн санаачлагуудыг дэмжин ажиллахад чиглэсэн бөгөөд байгууллагын үнэ цэнээ эргэн санаж, харилцагч, үйлчлүүлэгч нартайгаа ойртоход зориулагдсан юм. Улмаар хөтөлбөрийн хүрээнд ажилчид өөрийн ажлын орон тооноос үл хамааран хүргэлт хийх учиртай гэнэ. Тийнхүү цар тахал эхлэхэд тэд хөтөлбөрийг зогсоосон ч өдгөө сэргээн ажиллах болсон юм. Харамсалтай нь хөтөлбөр эргэж ирсэн явдалд дургүйцсэн нэгэн ажилтан цахим хуудаснаа дургүйцлээ илэрхийлэн, нэрээ нууцласан нийтлэл бичжээ.
1700 гаруй сэтгэгдэл хүлээж авсан түүний постыг үзвэл, “Би ийм ажил хийх гэж гэрээнд гарын үсэг зураагүй. Гэрээнд, ажлын байрны тодорхойлолтод ч биднийг ийм ажил хийнэ гэсэн зүйл байгаагүй” хэмээсэн юм. Харин DoorDash компанийн зүгээс хөтөлбөрийг зогсоохгүйгээ мэдэгдэж, ганц хүний сэтгэгдлээр бүхий ажилтныг төлөөлүүлэхгүй байхыг хүсжээ.
Эх сурвалж: USA Today